O 18 de marzo de 2026, o IES Lois Peña Novo recibiu a visita de Carmen Lence, presidenta do Grupo Lence, para o desenvolvemento dunha sesión formativa organizada polo Departamento de Orientación.
A actividade enmárcase no Programa Empresa Familiar na Aula e ten como obxectivo promover o contacto directo do alumnado co tecido empresarial galego, achegando experiencias reais de empresas de propiedade familiar con actividade nas principais compañías de Galicia. O programa está cofinanciado por Afundación, Obra Social ABANCA.
Durante a sesión, Carmen Lence compartiu co noso alumnado a súa experiencia persoal e profesional á fronte dunha empresa con máis de cincuenta anos de historia, abordando cuestións relacionadas co liderado, a xestión empresarial e as competencias emprendedoras.
A actividade completarase cun obradoiro de emprendemento de base tecnolóxica e cunha visita ás instalacións de Leite Río S.A., prevista para o 24 de marzo, que permitirá ao alumnado coñecer de primeira man o funcionamento dunha empresa do sector agroalimentario galego.
